Enkitoduaroto

Tipat enkanyit tiatua ilporori

Tenibolu nkilani arashu tenekimbung’akini enkitok pooki nayama nemee onolporror linyi naa irop ilo porror arashu olopeny pee ishukoki inkilani e enkanyit

Eigero David ole Moonka

Ore enkanyit naa atua intokitin naaji kutaan too ilmaasae etumieki. Inturuja nainosayu sogo o inemeisujayu naaji empariany etii.

Etiu anaa olmabarishoi loo olkuaak tiatua oltoniei le euria tiatua olee to olee, enkitok te enkitok, olee te enkitok arashu enkitok to olee tiatua isirito pooki.

Eworiworo tiatua anaa irishat kumok anaa enkipirta, kake kuna naibala; olg’asak le elukunya, enkirorokino too inkutukie, olg’asak loo inkaik, iltoiloishi loo ilg’oso te enkirorokino, emboita to iltirenito, eyopuno te emboita o irruatin o incholueti too isirito naarisio o inemerisio naitodolu enkanyit to olkuaak loo ilmaasae.

Enkanyit olkila, inkanyiti olkesen, inkanyiti olkerreti, inkanyiti entaloishi, inkanyiti o inchomito oo inkanyiti oo inkaaputi intulusi naatae to inkanyiti oolmaasae.

Eetae sii inkanyiti o ilmareita, inkanyiti too ilporori, enkanyit olmasi oo inkanyiti too inkishu.
Ore enkanyit olkila nejo itushulu isajat kumok tiatua intulusi naa olee eikok te eyaata sapuk alang enkitok.

Ore kutaan empariany te enkanyit olkila naa teninyaakino eng’uset ng’utunyi nekitoiwuo ayopu nibukoki inkulak nekitoiunyie opa minyi nemeeta sore.

Teniyopu sii enkitok nayamua minyi anaa enkitok enye, neya naa eisujayu tenetaa kintoiwuoki to olporror loo loominyi.

Teniigil sii ayopu paashe ino, ninturuja te enkanyit o inkishu o te enkanyit elukunya anaa enkanashe enjung’on olkerreti lo olmarei tenebo o inkanashara naatang’arie kina amuu eeku inkanashara inono oo ilturesh.

Enkanyit te enkaputani ino nekinchoo entito tenishori enkiteng nalepo naisujie enkanyit olkila to olaji otaaputana tenemutu opa etalang’aka negilakini enkanyit amuu nakata ake eiruk pee eisho ilo porror entito enye te kiama.

Tenibolu nkilani arashu tenekimbung’akini enkitok pooki nayama nemee onolporror linyi naa irop ilo porror arashu olopeny pee ishukoki ilkilani le enkanyit.

Tenitaa shepu ilkerra to oltung’ani lo olaji lino niyanyitu ina kitok enye anaa enkitok niteshepa te enkanyit arik enkang olmoruo lo olaji lino.

Teneshukokino olee noonenkapu enyenak arashu noo ng’otonye olaji naishopokitio isurri arashu inoo loo menye lo olporror eton eitu eidipakini intaleng’o olg’esher naa enkiturraarroto enkanyit olkila.

Related posts

Ormaati temurua e Kisima Kaunti e Samburu

JAPG

Ilarikok oodede: Empiron o inkishu naitodolu ajo eirowua olchokut aina

JAPG

Kakua ng’uesi apa meer Ilmaasai, naa kainyoo?

JAPG

Leave a Comment