Enkikoo Enkitoduaroto

‘Tagolie enkima, miaku ewushuwushi’: Enkitanapa naisho menye entito enye elo kiama

“Shomo imbung’a enkanyit naishoo-enkai ai, iyie natabolo inkipa ele tiren leng’utunyi pee erropil, shomo intorropilo kulie tirenito, nimisul iyiook enkerai ai”

Eigero David ole Moonka

Entito o inkiri ainei shomo taa enkitok, tabolo kishomi meimu olmaa,
intasheyie intaloishi pokira esiana nekincho Enkai, nintubulu inkera e kulie ainito amuu enkishon ino. Tagolie intokitin ong’uan te enkaji ino amuu ninche nekintaa enkitok nara enkitok etipat nang’uar pooki marei tenetii.

  1. Tagolie enkima; eniaji oo enolaji.
  2. Tagolie enkoshoke; inkoshuaak pokira olmoruo, nipal empiani, toshokisho aiting’ie olee lino esirae oo ilaron pokira.
  3. Tagolie osotua; olmarei lo olmoruo o elatia ino, mijoyio tenining’oki enyamali arashu osina, mintaya ngutunyi oo minyi laishoo esumash arashu incho eiduruk too ilashe, tooru eng’ironishu amuu nakata esila enkishon ino, mincho ake egil tauja tenkaraki enkiting’ino amuu kinting’in siyie Enkai.
  4. Tagolie eramatare pooki ninepua, ninyok aibung pooki toki iyata toki tiatua oo miyata, ore nabo ninepua naa elukunya olee lino, inoto esirai niponarie pee kiponiki Enkai aisho imparbali kumok.

Entito ai milo aaku ewushuwushi naruk aitang’or inkang’itie to olg’ejep lo olmarenke, amaa midol oshi ng’utunyi ajo meeta eruko oo inkituaak melo airrangirrang. Shomo taa ene enkiook oo ene enkongu, amuu nakata isioki ang’enaki olmoruo lino tenebo oo elatia ino, niparanare olmarei lenye te enkanyit oo to osotua.

Mesiakinoyu enkishon. Etejo opa Ilmaasae memurutokinoyu Enkai kishomi, taanyu pooki toki amuu itum, misi. Memanikinoyu enkishon nang’u amuu, meibooyu te siadi nemejoolayu te kwe, ekeyang’uyang’unye elotu naa taanyu mekimbulai te kipa.

Mijo maata arashu matum aikata, taanyu Enkai meimu kishomi ino, ning’asaki to olosingo. Intotio ildiain lo olmarei, tonyorra tenekiyooki ilkiriko lo olosho, nimitemu aisho epuo eitu eitupuru inkutukie amuu ine etii inkamulak entooma nairowuajie omom ino.

Shomo tagolie minyi o ng’utinyi, mincho esumash, mincho enkure, tang’adie sii oloirerio. Tooro inkik o inkulak enye anaa pee kipuo sii niche aawor nekintang’ar inkipa, tenekintaruokitio meyiolo mipidulunore tonyorra ometayiolo esipata amuu eeku inanaurri inono naaku ing’apeta tiatua iltirenito lenye kiimaki aadung’ie irashe. Taasa pooki toki sidai nemijo aitodol olmoruo lino arashu likae tung’ani, ore esidano naa Enkai eke nekiindim atushukoki te eseriani.

Oo-ng’eno oo-ng’eno entito ai amuu meeta enkishon abarani, moda ng’en ake nanotoko.

Tenitu isioki atum inkera, minkurrurro taanyu omeilepu inkamulak ainei te esapoi ino amuu aisho inoltau oo inenkishon entito oo inkiri ainei.

Shomo imbung’a enkanyit naishoo-enkai ai, iyie natabolo inkipa ele tiren leng’utunyi pee erropil, shomo intorropilo kulie tirenito, nimisul iyiook enkerai ai.
Toomono Enkai amuu milo aaku entum-etua.

Tayiolo kuna; mimit elekunya enkanyit, nintarasaki inkaik ilmoruak linono te enchipai arip. Mimit endaa pooki enkoshoke, impotoi amuu enkidaaya ino, shomo taa naituny inkera e kulie tirenito ilcholo.

Minap, nimishum ilapi too inkera olmarei lino, sikong’a te enyorrata ninteng’en aitubulu omekimpotieki enkarna aajo noonkera.

Tapala injo, tumurutoi olmoruo, nimurutoo enkakenya, nipal olom le makewon tiatua olmabarishoi lishom pooki toki. Tang’amu pooki toki nayau olmoruo lino too inkaik eba eneba to oltau oota enashei.

Shomo taa enkerai epooki tungani niaku ng’oto pooki ng’ae. Tusuja orrekie le ng’utunyi kake, mining enkig’uana enye amuu eitu eig’uanaki ng’otonye enkishon ena ang; eewuo aa osikiria obo aata oo enkiteng kipeke naitusujua ng’utunyi menye, eitu ake emitiki iyiook Enkai ena kishon pooki nitubulaka awok kularei nimej ing’orn oo inkishu nekitaarutua pokira oo ng’utunyi.

Enkig’uana olmoruo lino shomo teshetie enkang ino, mmee enolang’ata. Toiki sii olmoruo lino ilasho lenyenak milo aitaa olkutu.

Osoit olgoo lo olee mejurroyu, erruesha rrekie mesujayu nemeirritayu, inchoo elo esotore nekishukokino itii oltiren le enkaji ino pee etum oloip osaru neitasaru esotore enye.

Mayieu enkilopilopare oo enkirrang’irrang oltiren lai aishooyie sii, meyaisho osina neeku shomo ting’iria, naa tenekiyawa neeku iyie enedukuya pee kidung’ieki irashe.

Shomo taa entito ai o inkushu niminang silig, ebolo Ena kishomi ai dama o kewarie pee iimu amuu kinyor iyie.

Milo ake asul minyi, nekigurrum amuu aiba neiba enkai.

Inchoo eeku enchipai o intalengo, imashoi o intomon nekishuku ele Marei te enchipai kingorokino to osotua aaparana.

Sere enkoshoke ai pee aayooki aitulutoo ilkarash naisho inkamulak ainei pooki amayian.

Sere oloip lai lemme ololchani..

Related posts

Imbususi nairiki olmoruo o enkitok

JAPG

Ore olererio naa cancer, emataramat intaoni aan’g

JAPG

Ormaati temurua e Kisima Kaunti e Samburu

JAPG

Leave a Comment