Enkorok

Pandare, esintani, pabung’ae… Enkipirta oo inkarn naipotie Ilmaasai enkitok, entito

Eigero David ole Moonka

  1. Enkitok – Entoisho muriet olee nakesen intalip neitoiu olkesen loo inkang’itie, neitubulu olmarei.
  2. Entomononi – Enkarna pooki naipotieki entoishoi arip te enkamininishu naitoomonisho too ilomon le eseriani to olmarei lenye.
  3. Esila – Entito kirotet to olaji te emurata nataranyaka anaa erisiori esirit.
  4. Enkitapoet – Entito neitu eiu menye ilayiook neisimaa aaku olayioni le enkang neitujung’i olkerreti le entaloishi te eishoi, neiu ilayiook o intoyie eilo marei naa enkidapash enkang naiki, neishopoki menye opikaki inkera enyenak olmasi elukunya.
  5. Entito-Enkang – Entito neitu eyami natejo menye pee eton aaku enolmarei neiu inkera naa menye eipotieki, nejung olkesen le menye anaa ilayiook leilo marei arashu eiteru olkerreti lo olg’ilata lenye openy to olkesen le enkaji e menye.
  6. Entida – Eselenkei arashu enkitok kirotet to olmoruo arashu olchore lenye, nanyorri aitalang inkulie kituaak pooki olmarei.
  7. Enchuchula – Entito naa ninye ake enyor olmurrani neimeitushulaki kulie toyie teneboitare.
  8. Entoet – Eselenkei arashu enkerai kiti nawausarae ng’otonye anaa enkeene enkoriong; eselenkei nawuasare olosho, nashumu osiligi loo iltunganak menat neitagol irrepeta enyenak ilmurran tiatua injorin.
  9. Entito – Eselenkei pooki dorrop te kitishu neton eitu eitotoni, eselenkei pooki nang’arie likae oshoke aa kiti o aa botor.
  10. Esiankiki – Eselenkei pooki naitotona neton aa kiti terishata elelero enye, enkitok pooki kiti te eishoi neton eitu elipong’u, dorropu inkera.
  11. Emeboini – Eselenkei, esiankiki pooki naitotona arashu natoishe te enkang emenye neton eitu eyami.
  12. Patureishi– Enkarna naipotieki eselenkei nayamuaki inkanashara olmarei, naitureshoki aang’amu to olmarei to olkerreti le kiama.
  13. Esintani – Naa enkarna naipotie olee enkitok nanyor olporror.
  14. Olsintani – Olee onyor enkitok lo olporror lenye.
  15. Sintani – Enkarna naipotie enkitok nayama to olmarei enkanashe olmoruo lenye.
  16. Enkaini – Enkarna naipotie enkitok enkae nayamaki to olmarei obo kake olmoruo obo.
  17. Emparsinta – Enkitok nayamuaki too intaloishin olmarei linyi; enkitok pooki olalashe lino botor; paashe arashu pakuo ino.
  18. Olparsinta – Enkarna naipotie enkitok olalashe loo olee lenye.
  19. Esanja– Enkarna naipotie olee eselenkei arashu entito natang’amuaki enkiroret aishoo boo te kiama.
  20. Elang’ata – Enkarna naipotie olee ae kitok elikae lee namayama naitalang’aka aisiidaki enkong’u anyorru.
  21. Eselenkei – Entito pooki natubulua netaa eranyaki ilmurrat too isotoi.
  22. Enkiampirri – Enkitok nalo nainguaa olaji oyama too inkishu nelo opolosakino likae aji neiki inkera.
  23. Esainoti – Enkitok nayamuaki too inkishu neituluti ilkarash le emayian o iloomenye.
  24. Paker – Enkarna enchoro too inkaaputi naipotie olee enkaputani enye, enkarna naipotore Inkainito.
  25. Pakuoo – Enkarna naipotie olalashe botor arashu olkiti enkitok olalashe lenye ong’arie kina/ enkarna naipotie olaji entito nayanyitu pooki anaa olporror namuraki osinkira olutakini te emanyata eunoto olaji.
  26. Paashe – Enkarna enkimala naipotore enkitok o olalashe olmoruo lenye.
  27. Pabung’ae – Enkarna enkimala naipotor olalashe kiti liae taloishi enkitok olalashe lenye.
  28. Olupi – Enkitok neito aikata eisho.
  29. Enkoliai – Enkitok natua olmoruo le kiama.
  30. Entaapai – Entito nataapua inkera eton eitu eitotoni, enopa kata eton emurati intoyie.
  31. Enturuai – Enkitok kerere suuji nashal olkuaak lo olmabarishoi lenye.
  32. Esipolioi – Entito natumurataki arashu nayamuaki det neton eeta inkuk te elukunya
  33. Enkaibartani – Entito natubulwa olmasi natinyikaka embarnoto pee eriki enkang olmoruo.
  34. Pandare – Enkarna naipotore entito o ng’otonye olmoruo lenye.
  35. Enchoruet – Enkarna naipotore iselenken arashu inkituaak naitarino, Enkarna naipotie Olee enkitok naitarinore arashu enanyorrare.

Toponai inkarn neitu aiger nilimu enkipirta enye te enkitok arashu te entito.

Related posts

Imbususi te emboita olee o enkitok

JAPG

Imporo orrapi enkitok tolmarei

JAPG

Enkitoiunoto olaji

JAPG

2 comments

Loontutuk Kishoyian May 19, 2020 at 5:45 pm

David ole Moonka, ashe oleng tena damunoto nikinchoo Enkai nintobirie website peyie intengenie Olmaa.
Kimayian Olaitoriani oleng.

Reply
Jonathan Tatio July 9, 2020 at 2:13 pm

Ashe oleng’ Ole Moonka tena siai etipat nitaasa. Mekitamayiana Olaitoriani
tena siai sidai!

Reply

Leave a Comment