Enkatini

Keeya olayioni lol Matapato te enchukushuk

Etii opa Ilayiook ooshomo shoo te kiyopiyop oIldoinyio-Orok too Ilmatapato;

Neiteru inkayiook enkimalees aimalimal te shoo. Neiturrurro Ilayiook kuti aiguran too inareta; aa eshitu obo olalem neeku ekeitauno aitiida olalem elama, enang’u olendashoto aitiid olikae neitoki olikae adumu neintiid aishukushukoo, ore olatapong’o neitojoolieki likae ayioni. Ejo opa Ilayiook ina kiguran ‘Enchukushuk’, (kake inkeek ope eitiidi ilalema, neya neipadang’i aatil isilale arashu kulie keek oobobo.)

Neitumurruni toi endala anaa inoshiake kiguraitin oo Ilayiook naisiidi isilale too ing’errembeni.

Oo duo bata, emetii?  nejo naake olayioni obo loo Iloodokishu le enkang e Mayiaton aitiid olayioni loo ilaitayiook le enkang e Namuumu lole Pertet, neishaki olikae olalem enkujuk nesesekwan ake teine, neidip.

Neisik ilayiook, neitu eitayu aashitu olalem to osesen, neureyu sii epuo aalimu, nenya oltim eitu eimakini. Neing’oruni opa enkayioni nelauni; nelejisho taa ilayiook aajo kulie ayiook pae loo inkang’itie ootoshoroitie.

Ore to oltipilit liare eeta opa ele ayioni oldia lenye oonyorrare oleng lemeworo, keirukurukore ake te pooki wueji.  Neeku ekenyu ake neeyok oladuoo dia alo aboitare enaduo popong olayioni neshukunyie kewarie airrag ang.

Nemuso iltung’anak kituaak; nejokini ilmurran pee esujaa ilo dia taisere teneyok alo, pee eyilouni oshi enelo atonie endama nasho.

Neji kisuj, neinepuni eirrag tembata empopong olchore lenye, neiputukuny ilmurran, neshuk olkilikwai ang te esiokinoto eiputukunyo oleng amuu eturupe empopong neturia eshitu olalem.

Ore teina teipa, nerreshuni ilayiook pooki meetu te shoo, neiturrurri ilayiook to olale loo intare netudung’oki duo iloom shipiship loo isitet naatosisio. Neipeli taa tenkiti rishata neishirisho pooki te muro aajo kilimu anaa enataase, ‘megel pere kishu’ ewosho taa olotii opa olemetii.

Nelimu taa ilayiook pooki opa anaa eneikununo ina sesekwan. Neyiolouni aajo enkang oo Iloodokishu naitautuo bususo, neitoborri anaa Ilaitayiook pae oojung’o oo Iloodokishu to olkesen naa Ilenkaji oo Ilaiser pokira.

Neiguanae too inkajijik amuu menyae enkig’uana olayioni lememurata tiong’ata teneeku iloikop arashu sesekwan, ekeitanapae ake.

Related posts

Osina lenkaji natii olayioni

JAPG

Enkatini olmurani oshomo enkang Enkai

JAPG

Eneikuna entinki pee etaa enkirotet

JAPG

Leave a Comment