Enkitoduaroto

Kainyioo ejo Ilmaasae enkanyit?

Ore enkanyit olkila naa olee eikok te eyaata sapuk, mee enkitok

Eigero David ole Moonka

Ore enkanyit/inkanyiti naa atua intokitin naaji “kutaan” too Ilmaasae etumieki.

Inturuja nainosayu sogo o inemeisujayu naaji “empariany” etii anaa olmabarishoi loo olkuaak tiatua oltoniei le euria; olee to olee, enkitok te enkitok, olee te enkitok arashu, enkitok to olee naatae tiatua isirito pooki.

Need branding services? No other agency does better than us – Jonte Africa Premier Group

Eworiworo tiatua anaa irishat kumok naipira, kake alimu inkuti naibala; olng’asak le elukunya, enkirorokino too inkutukie o enkitarasakino te eng’amuno olg’asak loo inkaik, iltoiloishi loo ilg’oso te enkirorokino, emboita too iltirenito, eyopuno te emboita o irruatin, o incholueti too isirito naarisio o inemerisio naitodolu enkanyit to olkuaak loo Ilmaasae.

Intulusi naaudo oo inkanyiti

  • Enkanyit olkila
  • Inkanyiti olkesen
  • Inkanyiti olkerreti
  • Inkanyiti entaloishi
  • Inkanyiti oi inchomito
  • Inkanyiti oo inkaaputi,
  • Inkanyiti o ilmareita
  • Inkanyiti too ilporori
  • Enkanyit olmasi
  • Inkanyiti too inkishu.

Maimaki siyie “inkanyiti olkila” amuu ejo aitushulu isajat kumok tiatua intulusi naudo naipoto te eng’asunoto.

Ore enkanyit olkila naa olee eikok te eyaata sapuk, mee enkitok.

Ore kutaan empariany te enkanyit olkila naa; teninyaakino eng’uset ng’utunyi nekitoiwuo ayopu nibukoki inkulak nekitoiunyie opa minyi. Meeta sore. Teniyopu enkitok nayamua minyi anaa enkitok enye. Eya naa eisujayu tenetaa kitoiwuoki to olporror loo loominyi.

Tenishukokino enkanashe ino to olmarei, te enkang, to olg’ilata, te entaloishi arashu ene kipa.Teniyopu paashe ino ninturuja te enkanyit o inkishu o te enkanyit elukunya anaa enkanashe enjung’on olkerreti lo olmarei tenebo o inkanashara nitang’arie kina amuu eeku inkanashara inono oo ilturesh.

Enkanyit te enkaputani ino nekinchoo entito, naa eishori sii enkiteng nalepo naisujie enkanyit olkila to olaji otaaputana tenemutu opa etalang’aka negilakini enkanyit amuu, nakata ake eiruk pee eisho ilo porror entito enye te kiama.

Enkitok pooki nayama nemee onolporror linyi naa tenibolu ilkilani arashu tenekimbung’akini naa irop ilo porror arashu olopeny pee ishukoki ilkilani le enkanyit. Tenitaa shepu ilkerra to oltung’ani lo olaji lino amuu iyanyitu ina kitok enye anaa enkitok niteshepa te enkanyit arik enkang olmoruo lo olaji lino.

Enkiturraaroto te enkanyit naiturraki menye entito inoti oo inkiri enyenak, enatoiwuo te kipa arashu entito naino to olaji. Tenishukokino olee noonenkapu enyenak naa enkiturraarroto enkanyit olkila. Tenishukokino olee noo ng’otonye olaji naishopikitio isurri arashu inoo loo menye lo olporror eton eitu eidipakini intaleng’o olg’esher.

Related posts

Enduata naitang’amu enkibor olkishopiei loo imasaa o Ilmaasae le Kisongo

JAPG

Imbususi nairiki olmoruo o enkitok

JAPG

Ormaati temurua e Kisima Kaunti e Samburu

JAPG

1 comment

Lempuris ole Partoti August 9, 2020 at 11:22 am

Eisidai ake te nikitengen inkera ang pee eyielou enkutuk ang

Reply

Leave a Comment