Ilomon Olkuak

Intoyie 471 naataa intomonok

Eibalie olkitok lolturrur le AMREF te Kaunti  e Kajiado, Ndege Lugayo nchere, kepuei aisum nena amuratak inkulie oitoi naing’orunyei iropiyiani

Etisira Albert Lemomo

Eshomoita iselenken naalus 471 te Kaunti e Kajiado aadupore enkiteng’ena e wiki nalulung’a terishata naitalangaki niche metaa intomonok hoonaa torekie leme emuratare.

Etaase ena bae te sukuul e Amboseli Primary te murua e bunge e Kajiado e kopikop.

Eibung’aki ele kerrerri ng’ejuk peyie eeku elong’o narrip nena selenken natii ninche batisho teinamuratare o peishore ilpayiani moruak eton aa kutiti.

Ilomon na kulo oibalie nena selenken teilo sirua lenye le graduation ejo keishia neishori enkisoma otenebo sii eishori inkulie siatin e biashara inkamuratak amu meeta ninche kulie siaitin.

“Kitii yiook batisho amu meyiolo ninche kuna amuratak entorroni ena muratare. Nemeeta sii enkae siai naidim anotie ninche iropiyiani,”

Etoponayie Jane Shilun naa nabo oo nena toyie ajo etabawua erishata nalikini noo yieyio kulie oitoi naaing’orunyeki iropiyiani.

Eterepa nena selenken ina kitengenare ejo eitengena ninche eneiko teneramat iseseni lenye.

“Ore ena kisoma naa enetipat oleng’ amu ore iyiook anaa nkera, eiteng’enaki iyiook enikingo pee kiramat ate. Eiteng’enaki iyiook inikingo peyie kipaashare imoyiaritin naaimu….STDs…. o peyie kiaku iltung’ana biot nikintabaya inkisoma ang’ peyie kiaku iltung’ana le tipat too nkolong’I naaponu,”

Eibalie ake sii ninye Abigael Lakaram olarin 13 njere meishaa netii intoyie naurisho tenkaraki emuratare.

Einosa Miriam Parit ormumai njere kelo angoroo esipata toonkulie toyie tenebulu tenkaraki netayiolo ninye emion we nyamali naimaa iselenken tenemurati. Eibalie ajo kemunyak enoto ena kitengenare.

Ore ake eyia nejia, neibalie olkitok lolturrur le AMREF te Kaunti  e Kajiado, Ndege Lugayo nchere, kepuei aisum nena amuratak inkulie oitoi naing’orunye iropiyiani.

“Kindipa aatayiolo nena tomomok a nchere ore too nkolong’i kuti naaponu nikiibung’ entumo nikingilikuan ninche biashara naidim aataas. Ekiret niche tonkootoi sidan amu ore eripoto o biotisho oo nkera ang’ naa enaang’ pooki,”

Etoponayie Lugayo nchere, elo AMREF ang’oroo isipat oo nkera ometaba anaa neishunye ina nyamali.

“Ore isiai ang’ naa peyie king’oroo esipata entito nikiisum olosho le maa isidano e nkisoma too nkera pooki. Kinyokita siyiook iatabaya inkajendani e rais Uhuru Kenyatta nchere peyie eishuni emuratare oo ntoyie ebaiki olori le 2022,”

Eshomo enkarikoni e Gender and Social Services te Kaunti e Kajiado, Eve Marin, arep nena selenken te mpijan enye nashomo aanyare ina muratare oo ntoyie.

“Ore anaa serkali e Kaunti, kipuo aitashe tenebo ontae nikipuo sii aitaa ntae eutaroto sidai nang’uarri tena murua, naatapala ina muratare nenyorraa sii enkisoma e ntito. Kiata kampein nagilunore emuratare e ntito te Mosiro – erubata naa ninye nalo aisho yiook mataarare ena nyamali aishu pi tele osho,”

Ore tenjurore nataasaki na njere ore to olarin kumuk otulusoitie netii serkali e Kajiado esipil egilunore emuratare oo selenken, netipika irekei opaasha peishuni emuratare ooselenken.

 

Related posts

Ormaati temurua e Kisima Kaunti e Samburu

JAPG

Emirare oomasaa torok te Narok

JAPG

Kakua ng’uesi apa meer Ilmaasai, naa kainyoo?

JAPG

Leave a Comment