Enkitoduaroto

Intokitin masaa naitululung’u enkitok

Ore enkitok o ilmaasae neeta inkiasishoreta enyena, eeta entolu, ildireta, olbene, esosian, osikiria, ilotiaa, enauner, oltidu o olputet. Eeta sii olpinit, impiyayo, olpang’a, imotioo, ilonito, olarao, olmishire, oloirien o esos

Etisira Joy Kakenya Enole Barta

Ore anaa to olkuaak loo ilmaasae naa eeta enkitok irishat tiatua intukusi o ilmaasae, ore nena rishat naituruji enkitok naa olokesena, enkitati enkoshoke, esosian, emonyorit, ildireta o esos.

Ore kuna masaa naa ninche naitululungu enkitok, ore te kutaan o ilmaasae naa eituruj ilewa leton eitu epuo payianisho nena tokitin anaa empariany torrono.

Ore enkitok o ilmaasae neeta inkiasishoreta enyena, eeta entolu, ildireta, olbene, esosian, osikiria, ilotiaa, enauner, oltidu o olputet. Eeta sii olpinit, impiyayo, olpang’a, imotioo, ilonito, olarao, olmishire, oloirien o esos.

Ore enkitoo enkitok o ilmaasae neeta intanare naishiaa; enkaji te manyisho, olmarei, olosing’o, kishomi o entaloishi te kiyama.

Eyieuni sii neeta enkang te manyisho o iltauja loo ilkumok o olpaashie tirpe. Eeta sii olokidong’oi surut oitiamie inkishu o entulugumi pisua.

Eishiakino si neeta enkitok oltiren terit omurru oitiamie ilasho, naa oloirien oir eliyio aitorropil osim loo ing’atura.

Eeta nkituaak olpul opuru te enchukuu naikeleshori nemeeta suja o oleng’oti opuru emutu o ekenywa omir enkure, neishu esumash.

Eyieuni sii neeta enkitok erishata eluboto enkiring’o osesen nemeyiengunoyu naitodolu eluboi te pukoro o te aroni. Eeta sii olokesena orrotian enkanyit olmarei neitoip masipaishu oisudoo intong’oro etung’anishu.

Eyami enkitok neishori enkarna olmoruo narrepieki neipotieki enkishaa, enkoing’ono o ilbulabul le emayian edupatisho enye.

Ore nena arn naa noormaai, nariku-inkera, noonkipa, noonkokua, nalotu-esha, noo-inkishu, noorkiramat, noo-ilborisho, noo-larami o naya-enkop.

Eisho Enkai enkitok inkarn kumok enkitoo, aa sidain aa torrok, ore tiatua nena aarn naa kuna naisul; enkaimalani, enkaisokorani, enkayiarani, enkaleponi, enkaitoyioni, enkaramatani, enkaisotuani, enkaimulani, enkaisiritoni, enkaishoni, enkailejilejani o enkailatiani.

Eji sii enkitok enkaretonip, enkailupuoni, enkailuatani, enkamurani, enkaunoni, enkaishirani, enkaisiayiani, enkailejilejani, enkaidimani, enkoing’oni, enkaitameloni, enkarishani, enkaitululung’, enkarsis, enkaisinani o enkaisosioni.

Ore tiatua kuna rrepeta pooki naa keishoori enkitok neitung’uari olmarei le einoto enye nelo ajung likae marei.

Neiu inkera nemeipotieki, neramat inkishu nememishirakini, nejung likae g’ilata o likae osho o ae kop, nemany anaa enenye, neyier endaa, neshum kule naalepu openy naa ninye naing’opoki eraposhi, neshet enkaji nemeitore.

Tayiolo ajo meini oltungani pooki leitu eiu enkitok, eluboto oltung’ani pooki leitu aitaraposh enkaina enkitok. Eitu sii ebulu pooki tung’ani leitu ejut enkitok inkik enyenak.

Medupoyu nemegolu olmarei pooki leitu eitagolu enkitok, kirotet entito naji ene enkang alang’u olee leitu etum enkitok amuu olkirikoi  lemeeta ang’.

Related posts

Ilarikok oodede: Empiron o inkishu naitodolu ajo eirowua olchokut aina

JAPG

Tipat enkanyit tiatua ilporori

JAPG

Osayia te Enkai le enkitok nadupa tenasirie

JAPG

Leave a Comment