Enkitoduaroto

Inkapiak enkaji e maasinta

Neibelekenyate ilmoruak aaku, iloomorisho, nedekisho lemeure ajo esuj intalip enye Ing’ok

Eigero David ole Moonka

Ore duo Ilmaasae, Enkai ake kenya nasaru iyiook; tolut oleng olmabarishoi lang naa parrimang’at entonata oo induaat too inkasisin naikasieki to olosho. Emuno iyiook olkuaak naa alani olbuakunei le eramatare ang; egol, nerrish iyiook shang’arri, sapuk olmena to oloshomitore lenkiminata anaa esupato enkaji eng’ojiniak naakweniki emutai olosho lenye.

Egogong’ olkitamanyunei le enaboisho ang naa kira modoki too imbaa e edupoto; eng’u iyiook kutukie nebore inkotiama oo indaiki e oreren, nepi iyiook ng’ejepa te enkirrikino e maate king’oroo ilayiook le kulie oshon.

ADVERTISEMENT


Order top quality print materials  Click here


Elesho iyiook ene ajijik, ebobo iyiook ene gilat, eiroishi enaporori naa mang’atinta iyiook ene oshon. Etaa ilaig’uanak lang ilag’uenyak. Ore Ilairukok lang netaa Ilarutok. Netoolate Ilarikok aaku Ilapurrok. Netaa Ilasirak lo olosho, ilaisurok airrikinok.

Neibelekenyate ilmoruak aaku, iloomorisho, nedekisho lemeure ajo esuj intalip enye Ing’ok. Netaa inkituaak ang inturua nemeitoiu olosho, naariat inkipa oo ilasho etii inkoshuaa, etemena erropili e kiama, mekure eure osul le enkishopo, nemekure eshil intalipa oo inkirragat oo ilonito oiki ilasho lenye. Netaa intoyie ang inkaaitoi oo ilkonosi le pooki oilole nemeeta aloli iloipi lenye.

Etaa ilewa lang ilaisurok loo ilmareita, ilkitekeny lo olosho, ilaisurok le enaboisho, ilaisung’urok le esipata, ilaikitalak lioreren le enkidaaroto olosho lenye, ilaikeleshok loo ilg’arg’ar too ilpuli loo inkishu enjore olosho lenye, etonyorra enchiligi e pesho aaitalang enyorrata enkiteng, etobobuaa indamunot, netonyorra inkutukie oo imbaai aaisij imulayani te eropiyia emirata enjung’on enkulukuoni olosho lenye.

 

Related posts

Osayia te Enkai le enkitok nadupa tenasirie

JAPG

‘Tagolie enkima, miaku ewushuwushi’: Enkitanapa naisho menye entito enye elo kiama

JAPG

Imbususi nairiki olmoruo o enkitok

JAPG

Leave a Comment