Enkitoduaroto

Ilarikok oodede: Empiron o inkishu naitodolu ajo eirowua olchokut aina

Ore olarikoni asipani naa eeta enkitashoto, meigusuguso aijutujuto too iwolat enyenanak. Enkitashoto toi naisho olarikoni pooki emurra neitodolu erupai oltoniei lenye hoo tenaa elimu eitashe

Etisira David ole Moonka

Ore esipata naishiakino neyiolou pooki obo lang naa meetae oltung’ani lemee enkarikoni arashu olarikoni.

Tenaa enkampuni kirikoorito, arashu eumata oltim loo iltung’anak, ilturrurri loo ilkiamani, eyaata oo ilchoreta, ilmareita lang, arashu kirik ate tiatua ilkwaaki kinteng’enuo, naa kira ilarikok pooki te eyaata sapuk naibala olbuakunei le takano.

Hoo tenaa iyata emurra aikaja kake epirik esurungu oltiren likurrorre, tayiolo ajo empiron o inkishu naitodolu ajo eirowua olchokut aina. Naa teina rishata kitumoki pooki aitalala iltirenito lang too inkipurrot empushuna aayioloki ote emurra erikore.

Ore ilarikok asipak naa eyiolo ote aajo keloong’ae ninche, eyiolo enkitashoto oo ilomon lenye. Eyiolo olmabarishoi oo isujakinot naagotokino aashurie, mepuny, meeituny, nemeruny aasioki aibelekeny indamunot naatang’arie olosho te dede.

Eitaanyu iltung’anak oorikito metujurru nesipu aayiolou tipatishu oo induaat enye maate pee eiriamari te enkeju nabo nemewuasha.

Ore larikok asipak naa esho lukuny, ilmakititia oolimu te ewuas intililia naaiba neitapaash olosho olminong pee merrorro te kutaan eitawang’u inkoitoi enye pee meji sunguro, nebolu inkaaisudoro tililia pee meutieki olkimojino loo ilkiyioi lo olosho.

Ore olarikoni osipa naa eiba enkirrikiono, menyor irrepeta nemenare, mekus sii olokusi le likae, nemisimaa irrapi elikae ayioni onyokita.

Meidopisho nemejaaya esipata elikae, ekeinining’isho nemeikurruro tenekurri, megoro teneeku etekeshaki te emonkoi eeta esipat kake, eisilig asujaki esipata oo ilkumok te enkililioto enkishui enye.

Meure ninye ilcherat oong’u loo inkutukie oo isuuj, memirare inkwetat oo ilturua amuu mekwet eitu eshalu.

Meure enkisuro o ilekop too irrepat enchere enkiti rishata arashu meng’or kewon te enkarriyiano olg’ejep lenye.

Meshumu sii olpuud te enkitoo naishoo olosho aitunyoki esipata olmodai enkop. Ekeiturrur iwolat naatoning’o o inaatoduaaka kewon neibelekeny tesipata aitodol olosho enkoitoi naisiasha.

Ore olarikoni asipani naa eeta enkitashoto nemeigusuguso aijutujuto too iwolat enyenanak. Enkitashoto toi naisho olarikoni pooki emurra neitodolu erupai oltoniei lenye hoo tenaa elimu eitashe.

Ore olarikoni odede naa ejo taasa anaa enaasita kake mengidare atejo taasa anaa anaatiaka pee iyas.

Ore olarikoni odede asipani naa eur enkiook ainining’u enejokini hoo tena enkerai kiti nagira airorie, mepuny ashuku ewolata eitu eibirribir entonata ororei, meeta oltemeneyio le likae.

Meeta sii olkorio, nemeilepunyie aibalunyie empushuna ajo aitieusho arashu egisu likae tung’ani pesho hoo teneeta inkai naang’orie kewon.

Ore olarikoni odede naa asipani too iltung’anak lenyenak, emany atua iltung’anak lenyenak, meilatian nemeitarin olosho oikino. Eig’uana anaa ilkekuno neparanare iltung’anak lenyenak anaa inkakeny naishoo enkai enkishui etii erikore oo metii.

Epaashare ing’ok, imbususi pooki, enyok aisul atum enkanyit nepaash intokitin naitikirraa ilayiook o intoyie nemeeta tipat te enkishon.

Ore olarikoni naa olchani oshal ng’erng’erri, oloip oitushurisho omelok ilg’anayiok te pooki ng’ae olutoo, ore olarikoni o enkarikoni nadede naa meisepe, meulu, melejisho neme olajayani.

Etejoki opa, meishu elukunya nabo eng’eno, manototo te kulie rishat kitoponaitie takano.

Related posts

‘Tagolie enkima, miaku ewushuwushi’: Enkitanapa naisho menye entito enye elo kiama

JAPG

Intokitin masaa naitululung’u enkitok

JAPG

‘Men conference’: Inaamakua olee tolmarei lenye

JAPG

Leave a Comment