Enkitoduaroto Olkuak

Enkishui entito/enkitok ormaa.

Melelek apa isiankikin naanutayu ene dukuya elimu ajo enotishote

By Benjamin Tipatet

Ore apake pee eyami enkitok naa keisiliguni pee ebolo en’guset enye netumisho. Ore taa pee etumisho enkitok nejo irmaasae keiteisho. Naa ore ormonekie obo oibala apake moitie naa enyimore natum enkitok.

Medupa apa irmaasae eramatare oo ntare niaaku inkishu eyieng’i. Ore pee eyieng’i enkiteng’ neng’asieki enkitok naiteisho enoonkilani najon meinosa. Melelek apa isiankikin naanutayu ene dukuya elimu ajo enotishote.

Ore tenkaraki ina amu inkanasan apa sapuki emanya irmaasae naa keyieng’i ake enkiteng’ neipotori inkera kutiti orpejet. Neishori isajat oo nkiri narapuni ake duoo teina kiteng’ mewaita ang’ pee epuo inoong’otonye aapejoki.

Neyiolo ake intasati kituaak enkipirta e kuna sajat. Nepej ake paa keipotuni isiankikin naaiteikini aajo eiteisho pee ewonyu aaitaunyie en’dung’on. Orreshet ele otijing’a inkumok kake enotoki duoo enayieuni!

Eworunoto en’daa

Ore ake pee eibalayu ajo ee kenuta esiankiki naa keworuni en’daa. Ore enkipirta ena worunoto en’daa naa nchere pee mesapuku enkerai te nkoshoke nelaikino atupuku tenebau enkata.

Ore ena worunoto en’daa naa kelo negol amu elo naa ore ena siankiki naworuni negolong’u naleng’. Ore pee eaku ina naa keshuki enkang’ e ng’otonye nayiu meshomo aboitare neramat ometijing’a aji sere.

Ore taa tena rishata naworuni en’daa naa kelo nekenyu neishori enaduoo siankiki eyilata metooko nedumu eng’udi alo shoo. Ore ade pee ebau neidimi aishoo enkare nemeba toki metooko pee elopisho. Neitodolu taa ilopat tenaa keinosa toki!

Eshumakini sii kule mewoto paa keitushuli o enkare newok nelo shoo. Ore taa pee eteyieng’ishoteki neishori eronkai neton eitondol pee eropie olodua tenkaraki esumash. Ore pee elo ena siankiki shoo naa keji pee elam en’dumare oo in’daiki ti ang’.

Nenya taa ele siaat ometurrudo. Inchere etaa keisho. Neitodolu  taa enkoshoke amu eeilep aing’uaa olodua. Negumu sii inkonyek. Etumi taa osiligi inchere aisupat pi enkerai netaa keibelekenya aing’orr eneyiunyieki.

Elo neburukusha enkitok nepuku enkerai te nkaji enye. Neeidim ataarakinoyu enchoto nabo teitanyamal ng’otonye naleng’. Etii ake inkaitoyiok naa keipotuni ake neshorr entomononi enkoshoke neshukoki enkerai enkaji enye. Elimu sii te nkarriyiano enye tenetabawua enkata. Naa tenelakua ake sii nelimu.

Ore taa metaa enkoshoke ake etoning’o nemetii em’burukushata nelotu enkaitoyioni. Nelimu eneba enkata nang’orr pee ewomon Enkai aisho. Neishori eyilata paa kelopi meyishunye olodua. Neitashalunyie olturunki le kule lemetii sukari.

Ore pee eyiolou enkaitayioni ajo isaai naang’orr pee ejing’ esiankiki aji nemeliki. Eyiolo ake ninche aajo sapuk inakata emion oleng’ kake keleji esiankiki aajoki eton aa kiti emion amu teniaaku eyisho naa kesapuku alang’ ena!

Kejo ake enaduoo siankiki aikon’ji etomilo duoo emion nena enkerai naibung’tae!

En’dung’oto o sotua

Osotua oshi oibung’ie enkerai o ng’otonye. Naa ore adake pee epuku te nkoshoke naa kedung’i naa metotona oltung’ani openy.

Ore taa pee epuku enkerai naa keishori ng’otonye eembe. Neeing’ang osotua katitin ong’uan ejo “im’bung’a oltau lino maibung’a olalai” paa keitarasaa enaduo embe metudung’o intasati osotua amu medung’ ninye ng’otonye.

Ore ake tena rishata netiooyo emudong’. Neitadoikini enaduoo tomononi osayei irgoso pee eeinyig pee epuku emudong’ elulung’a! Ore pee elusoo ina neyae inkaitoyiok enkerai aaitaman eng’ape katitin ong’uan eibung’ita inkejek neing’orie elukunya enkop newoshitoi ake tenkitati!

Eidipa taa ninche inkaitoyiok esiai enye neitoyiu entito. Neponu ilewa aaikilikuanu aajo, “Kainyoo toi king’oroki enkerai?” Ore naa amu entito, newaliki intasati aajoki, “Eng’ang’a orbung’ae ning’orokiki entawuo”.

Neliki taa ena pooki ng’ae lemetii enaduoo aji nayiunyieki enkerai ajo entito etoiwuoki! Nepuo taa ilewa aaibung’ orbung’ae neyen emurt paa keeing’ang’ kake meng’orr. Nelaaya ake paa keeibung’ entawuo neyen emurt neng’oru taa osarge.

Ore ele sarge naa keitobirieki nailang’a o nkipot naa in’daiki enaduoo tomononi!

end of part one

Related posts

Ilarikok oodede: Empiron o inkishu naitodolu ajo eirowua olchokut aina

JAPG

Kainyioo ejo Ilmaasae enkanyit?

JAPG

Kakua ng’uesi apa meer Ilmaasai, naa kainyoo?

JAPG

Leave a Comment