Enkatini

Eneikunu Ilmaasai enkitoiunoto olaji

Ore te enkaji e odomong’i naa ilmolelian, ilmoinko o ilmokesen ilgilat ootae

 Etisira David ole Moonka

Egelisho apa ilamala netumi inkajijik artam ooudo naaji emanyata, eiturrurrokino olosho neisul olporror pooki anaa ilaitoomonok loo ilmaai.

Eetae olamal loo ilmurran tenebo o loo-surutia ooshomo aayau intasimi o enkarna olaunoni osajikini olaji.

Ore te enkaji enkiteng narok naa kulo gilat esajakini olaji; iloodokishu, ilpartimaro o ilparkeneti.

Ore te enkaji e odomong’i naa ilmolelian, ilmoinko o ilmokesen ilgilat ootae. (Epaasha penyo anaa iloshon oshi taata.)

Meibungi ilgilat oosakutisho, ilayenak arashu ilaisi.

Etii inkasisin onguan etipat tiatua ena manyatta enkang o intoluo; olaiguanani le esirit, olaiguanani omishira enkupes loo Ilmurran, olotuno oibung’i o oloboru enkeene oibung’i.

Entito anashe olaji teilo porror naanyitu esirit namur osinkira najo pooki murrani pakuo, nepuo ilmurran pooki aalutaki ilo sinkira otumura pee eeku kutaan enkanyit olkila leina tito.

Eibungi kuna asisin anaa ilkikenat oosinya lo ilkekuno oodema te enduaata olapa le Enkai.

Eeta kulo asajak lo olaji inkishu enye naaisho see nemejaarieki.

Eyamakini entito olaji nelaakini inkishu enkaputi, mesiri sii entito natuuta arashu natisira olaji lenye pee melesh olaji lenye, nesiokini aayamaki tesiokinoto oleng pee etum enkima te boo teneshukokino enkang e menye.

Eyanyitu ilewa pooki leilo porror lenye ina tito, amuu meitokini aajaarie ae toki enye pee mejung olaji. Eiki ina kitok enye kulie maasae pooki. Nena kishu ake sii eishori oloboru enkeene.

Oloboru enkeene esajakini olaji lenye pee edupoyu olaji, eishori sii metushuma ilidat olchoni lo olkiteng otasajakaki olaji lenye nepuuoi aalak etabawua enkata nainosieki inkiri.

Ore tena aang neetae iltung’anak ooji iltaasa, ore obo lenye naa olpayian odung inkumurri pooki naatii boo enkang o naibung’ieki olotuno neji ilo loo-intoluo.

Eetae sii olpayian laa ninye menye ilayiook arashu ilmuran neji loo-surutia. Eetae sii ologor olkiteng te endapana neetae likae lojaraa emaal olkiteng.

Etii sii oloitushul abukoki kule emaal o olobukoki emaal enkampu o olamal loo ilpayiani lo olporror ooshomo intaleng’o. Eetae sii ilkiriko loo olporror muj.

Ore kulo pooki naa eshukokini olkuaade loo olerrinyoret aisho pooki inkasho tiatua inkasho artam o naaudo naaworro ilkiriko to olale loo isek, lemeduaki inkera arashu ilmurran enkesha enye.

Eranyakini olkiteng osaji, neibungi olotuno teipa tenebo o oloboru enkeene neitoluaari, nepiki atua aji, nedeki aishaki intokiting pooki torrok, neeku taa enkishui enye esajata to olporror.

Esioki alusoo to olaji, mewoliki toki amu edua kutuk oleng, eirrag sii inkajijik olaji kake menyorri oleng, nemeinyototo aitashe aig’uana too ilkeek le enkig’uana.

Ena oshi enkitoiunoto olaji too ilmaasae natii enkishui oltung’ani oitauni anaa olasar, neitanapi intorrok, o imbususi pooki te enkaraki a enkishui o enkishon o ilkumok.

Related posts

enkukuu tung’ani oltialei obo, o inkutukie are

JAPG

Osina lenkaji natii olayioni

JAPG

Bubuka: Eng’oki olmoruo ming’ani nayawua osotua Lolntorobo olMaasai

JAPG

Leave a Comment