Enkitoduaroto

Enduata naitang’amu enkibor olkishopiei loo imasaa o Ilmaasae le Kisongo

Ore tiatua iloshon le Maa, Ilkisongo loo Iloitokitoki ake leton eitu eibelekeny enkurroto o imasaa

Eigero David ole Moonka

Johannes Rebmann ( einoto -January 16,1820 – Enkirrag’ata/keeya October 4, 1876), apa olmusheni ledukuya oing’uaa enkop oo Ildashi (Deutschland) oyeuo entalare enkop o Olkila Orok, ailepu te Enaingola o Ilmoindi (Indian Ocean) neshepu enkop o Il-ng’uesi (Wasambaa) nelimu enara o Ilmaasae oIlparakuyo nairraga to olari le 1835, natarateki toing’ata sirua eisimaa Ilparakuyo empaash ekopikop, nayetuo aisulie namanya o taata.

Negiru Rebmann Ilampareg (wapare),  Ilmuteita (Wataita) ometabau enkop o Ilkindi- Wachaga,  eboitare Johann Ludwig Krapf nedol entapukai naibor Oldoinyio-oibor, nataanyikitia iloibor eitadedeyie esipata enye anaa olaikitalani kitok misioni le Kanisa e Lutheran,  ejo,  meetae Ildoinyio oota enkurriny enkare soit otumi tiabori osororua oipolosh sesuseu te enkop olkila Orok.

Eewuo ina duata enkuriny naibor soit aitang’amu enkibor olkishopiei loo imasaa o Ilmaasae le Kisongo,  neimin enkarna opa yioloti naji Ilorook muna te eng’amunoto Ororei le Enkai oyautua opa lelo Musheni, neeku ekeibor imasaa oo nekiro..

Ore to Olari le 1861 o 1865, nelotu Karl Klaus von der Decken  eboita o Johann Ludwig Krapf aitisipaa shakenisho,  neishakenu enduaata e Rebmann aajo esipata etoduaa enkurriny soit te enkeper Oldoinyio-oibor.

Neipolos pokira aadung te enaidurra aitorit Olosho le Maa omeshomo aadol Oldoinyio-Keri ajo eng’ar lelo doinyio Olmonekie.

Etang’asaki opa aureyu eipolosi Olosho le Maa tenkaraki a empijan o Ilmaasae etumuta kulie oreren otaaniki neisulu tiatua iloreren kumok oleng. Teine taa enoto kulie elusie nayetunyie atua inkishu e Maa, anaa loo Sir Richard Burton, John Hanning Speke, and David Livingstone.

Ore anaa eibelekenyate imasaa Olosho le Kisong’o, neijia sii niche etiu imasaa tiatua kulie oshon loo Ilmaasae anaa inkutot enye. Tenilo Ilmatapato, Ilwuasinkishu, Ilmoitanik, Ilpurko, Ilkaputiei, Ilkeek-onyokie, Ilarusa, Ilparakuyo Okk; idol ake ajo epaasha ake imuatat, o intashat too isaen tenebo olkishopiei loo Ilkarash anaa imuain naapashipaasha pooki. Ilkisongo loo Iloitokitoki leton eitu eibelekeny enkurroto o imasaa te enkata naado oleng.

Related posts

Inkapiak enkaji e maasinta

JAPG

Ormaati temurua e Kisima Kaunti e Samburu

JAPG

Kakua ng’uesi apa meer Ilmaasai, naa kainyoo?

JAPG

Leave a Comment