Enkatini

Bubuka: Eng’oki olmoruo ming’ani nayawua osotua Lolntorobo olMaasai

Enkatini ena olmurani oisilisilie oldia lenye endaa, neyaki kewon engoki naibooko ilayiok loonkituak enyenak isapo

Etisira David ole Moonka

Etii apa olmurrani le enkop naji Sering’et lo Olporror loo Iltareto oshomo olwuamba openy neitu etumisho. Eeta apa ilo murani oldia onyor oleng, oiriamariyie pooki wueji nelo.

Nelilita ele murrani ilkekuno imiet eitu aikata etum toki nainosa, eboita oldia lenye, erripo pokira endama oo kewarie, naa tenelo eing’oru enkare nawok, newokisho pokira.

Neshalu olmurrani oleng ometaa ingululum einosaa too intimi elo.

Netum ewolata, nejo:  “Alo inkapunia natii oldoinyo lolIlmalasin aing’oru enkeleshe too ilpuli.

Nebaya eipira enkolong, newosh enchata, nepuo ilmurran otii oleng’oti aanangare, nedoli aajo ninye ake openy oo oldia lenye, neyakini enkiring’o emputuai, neinyototo aisarrisar aingoru enelo apejie – (ewueji nemeirrash toki).

Netum esumpat olkeju oruko enkare, nepej enaduoo kiring’o ore ake pee ewoku neisarrisar adoiki atua olkeju eboitare oldia lenye.

Nedung’udung’oki enkutuk ainyirgitaa isura, ore inkwarri naadungoo neishilishilie oldia anaa oloshi oitarasaki, kumbe embata enkare enang’aki. Neirug’o oldia ajo asaru enkwar, neya enang’ari enkare aitulusoo, neiko neijia omeishu enaduo putuai pooki eishirakita ake oldia.

Ore pee eidip neshukoki olalem enchashur, nedumunye airukurukore oladuoo dia olubo pee epuo ade inkang’itie nataana aing’ataa enaimin enteipa.

Neton olapa murrani, nebarni te ewokoto ekule, neyamu enkitok edukuya, nebol Enkai eng’uset neisho, nebulu enkiti ayioni, neya enkare agor metua.

Neyamu enkitok e are netum ae ayioni nebulu aikabu penyo, neya enkare anaa olapa le dukuya.

Neyamu eneuni oo eniong’uan neiti’u ake anaa inkulie.

Metii taa enanyaaka aisho, ore amuu eeta ele Murrani inkishu kumok nejo ayamu ake omanoto enasinya.

Nejo, oi kiti alo kenya atalu ajo kaa bata naainepua pee matumito enkishon.

Neitoki ayamu inkituaak naaudo neeku ilmong’i pooki to olosing’o amuu metii nabo naisho.

Netum ewolata natang’arie esirit, nejo alo Oloiboni maiboni pee eyiolouni esere.

Nedumunye olpayian alo aing’oru ilang’eni loo imbaa enkutuk arashu ing’ok.

Nejokini Olee miyata eng’oki nemiyata enkutuk amuu anaata miyata imasaa naabanji. Tenemutu naaji ining iyiook naa ajo olkimojino le esakut iyata, shomo oloiboni mekitooshoki isoito.

Nedumunye olee alo enetii oloiboni, nejokini too ilokorri loo Iloibonok kumok, shomo enetii ilang’eni loo inkoon amuu kutuk iyata kake olkimojino, meibonoyu eng’oki niyata amuu mekidolita toki.

Neton opa alilita omenoto oloiboni ang’eni otiaka eng’oki iyata naa eng’oki olmoruo ming’ani le meeta enkutuk; neeku shomo ing’oru ilang’eni nimbirribir siyie ayiolou ajo kalo moruo opa ilo ming’ani lintarruoko amuu inakata ake etumi enkoo nekintukieki pee king’uaa bubuka.

Nelo opa aibirribirrisho omeidetidetu likae kekun oldia sas oishirakita oleng te emion anaa olototiro esumash terishata naado. Neidetidetu too inkolong’i naairukuruko ailusulus ometejo, alo pae ainosaki ilaikook ena pukunei enkidetidet amuu etii toki.

Neinepu ilpayiani le sotua too inkaulele enye, nejokini shomo tooshoki ilo dia isoitok le enkidong amuu ebaiki naa ina ng’oki nekinosita intolo enkishon pee eibooko ilasho isapo.

Nejo oloiboni awosh enkidong nesipayu katitin uni ajo eng’oki oldia natubuka Enkishon.

Neipoti ilaig’uanak lo olosho etii ilkulenye, nelulung’akino olg’ilata pooki tenebo oo olporror lenye, neig’uanae omeshomo enkolong enkaji enye naidapashae aang’arie olchoni enkig’uana pee etumoi te oltipilit liare.

Ore nasirie etiiki oleng’oti aayieng’isho ewokitoi elimanet osarge lo olkiteng oteyieng’akaki enkig’uana, neishurtutunye olasurume orok ang’ung’ur olkiteng ailiang empolos adooyo eirag akurro enoshi kata ake peidipi atajaarai emaal. Neipoti Ilaisi oo Ilang’eni metolimuenkipirta eina pukunoto, nelauni oltung’ani otayiolo.

Eetae opa oltorroboni otii ong’ata esiring’et ng’en aisul neyiolo inkoon enauta. Newoshi ilmurran ooshomo iltipiliti okuni pee epuo aipot meeu olchani loo Ilaig’uanak lo olosho, neishori Ilmurran enkashe nairiamariyie aarewaki, anaa olorokutuk le enkanyit pee megolong’u.

Ena ake etodolua Ilmurran to oloipang’i, nerrishaki ajoki “mejing’ijing’i enkang ai amuu ayiolo anayawua intae, enchom erraga enda ang e aulo pee kitumo te enkakenya aapuo osupuko le Korongoro, embainiki enkashe ilo ale otii ilasho”.

Nekenyu neeku neijia, nepuo airiamari te enkeju nabo ometabaiki oloika le endoinyio naisiritore olokeri le enkang olapa payian.

Etabaitie dama, neinepuni iltasati ererio too iloipi. Nedumunye pooki aimal Olang’eni loo Iltorrobo anaa ilajijik to olg’asak loo inkaik, neipang’u inkituaak pokira naaudo tenebo oo elatia aang’asaki sii ninche.

Neji maape Olchani, neinosaki anaa enatiu tenebo oo olasurume atung’urusa olkiteng empolos ateyiang’akaki esiamo naewuo enkang.

Nejo Olang’eni loo Iltorrobo le siring’et, oi elelek ena amuu etaa Ilo asurai enkopito naitodolua erishina naitopokieki enaang nataa olupi.

Ore Enkoo naa ena, ayooki ashilu olkiteng oisul ena boo osinya, neyieng’i tiong’ata nemeporori enkiring’o enya arashu osarge, enturrurru ildian pooki le enkop nairo oo enetigire, tenebo oo ilayiook pooki lememurata amuu intiroi, entoki ng’iro.

Nedung’udung’okini ele payian ilayiook oo ildian pooki meinosa aaraposho enkewarie nasho, eitang’ari sii ae ng’ues pooki osero eisul ilg’ojiniak amuu enkaji osotua to olkesen.

Neitauni Ilkerretin to olchoni pooki leilo kiteng, neiturrurri anaa intashat naaudo aitaleng to olpura metudumu ong’ata aishopoo.

Menapi enkiring’o ang, mewonyuni, nemeidapidapi, ong’ata ake eishori meinosa pooki.

Neikoni neijia, anaa enkoo naishorua olang’eni loo Iltorrobo, ore to oltipili liokuni neiter inkituaak aadol pooki ilkilani.

Nejo amanu olari le Enkai, neng’oriokini inkituaak ilbung’aikop ooudo, netum olapa payian intomonok naaudo naaitanakita ilayiook ooudo too irishat nemedut ilapaitin.

Nebulu ilapa ayiook te esirit nabo, nerisioroyu anaa ilmao ooudo lemeirishayu tiatua Iloreren. Neitoki ilopa ayiook aapuo aayam intoyie naaudo oo Iltorrobo, neshula olkesen loo Ilmaasae oo Iltorrobo le siring’et nejung’i aitaa Ilmaasae, eetae lelo Maasae le siring’et oo duo kiro tena bolunoto naa ninche tenarishata oota erikore olorika kitok teina kutoto.

Neiting enkatini ai teine.

Related posts

enkukuu tung’ani oltialei obo, o inkutukie are

JAPG

Eneikuna entinki pee etaa enkirotet

JAPG

Eneikunu Ilmaasai enkitoiunoto olaji

JAPG

Leave a Comment